設計貿易就係絕對嘅惡? 原創設計嘅價值又係乜?
眼看學子文早前提到設計貿易嘅現象，部份讀者反映學子負皮過大而毫無事處，更甚有睇唔過眼嘅台灣讀者以低能兒嚟反擊學子人格，我只可以話學子真係”壞過凱婷”。不過有趣嘅係，學子文已吸納左一批新嘅台灣觀眾，負皮影響力果然唔可以睇小。
實話實說，學子嘅語重深長係多餘 But Nice To Have。秉承著”講講講，做啦柒頭的”XXX設計教室”原則，我亦想以實例分享嚟回應一下文中提到”鼓勵大家冒險嘗試開拓新風格新想法，去了解歐美日為何往往走在時代尖端”嘅說法。接著分享都以 Branding 案例為主，除左係香港平時流傳嘅"乜品牌醫生論"、”乜品牌非只係 Logo 設計論”、定”乜品牌都係放隻字體就叫Logo論”等等之外，我地又可以點樣以更多嘅角度嚟學習 Branding 係乜乜，去了解一下原創同品牌之間嘅關係。
原創固然值得尊敬和支持，但水平未必有所保證亦喺現實，原創設計相對設計貿易無論難度、風險以及投入成本都上升唔少。品牌嘅主理人對原創嘅理解至關重要，基本會左右品牌嘅發展上限。品牌通過原創設計嘅投入，實際上又可以得到點樣嘅價值呢?
強如設計強國——日本，於 20-50s 年代嘅工業設計就充滿著”非原創”嘅設計貿易現象，”Made in Japan”名聲最初只可以話係麻麻地，原創設計嘅實力偏弱。1958 年，當時日本外務大臣藤山愛一郎訪問 London 時，被記者質問日本品牌山寨嘅現狀後，在海外引起左極大嘅輿論同壓力。自此日本嘅工業設計走向原創開發之路，並出產左日後日本經典嘅原創設計就無需我再多講一二。
以下兩個”設計貿易”嘅經典案例，以作參考。
1935 Leica IIIa
1941 Seiki's Nippon
1951 BMW 1951
1953 DSK A25
從 1950s 開始，只有少數嘅日本品牌喺最初就一直專注於原創設計嘅產品開發。其中之一就喺Sony，包括 1955 年嘅 TR-55, 1979 年嘅Walkman, 1985 年嘅 CCD-V8，再到今次會同大家多分享嘅 1988 年 The First Sony 系列之作。
The First Sony 項目出發點本身就充滿著實驗性嘅原創精神。產品系列以RGB色系機身為主，結合渾圓嘅線條感，創造左極具玩味嘅原創設計美學，既包含一貫 Sony 高技術在內，售價亦唔喺只係玩具級消費(就係貴!!) 。Sony 當年對 The First Sony 系列嘅寄望喺 “兒童喺首次體驗影音產品時，希望可以激發起佢地對科學嘅興趣”，系列設備之間仲可以通過連接而擴展更多功能。
時至今日，The First Sony 仍然係音樂發燒友嘅收藏好物，My First Sony 多功能卡式機，既可播放及錄製卡式帶，亦加入了電子鼓嘅功能，能轉換成模仿動物叫聲嘅聲效，通過黃色按鈕可將鼓聲錄製到卡式帶之中。
The First Sony 作為 Sony 原創設計嘅一次重大突破，為 Sony 產品家族注入左嶄新嘅”品牌色彩組合元素”，從 Walkman, Personal Computer, Playstation Controller 等經典設計之中，我們都持續地可以見到佢地嘅身影。
依種“色彩印象”除左承擔左美學和功能作用之外，其背後亦代表著Sony品牌視覺文化嘅哲學觀 —— 喺歷代產品嘅更新過程中，設計既有其恆久不變之處，亦有其隨時代而變的特點，而品牌色彩就如同一種專屬於Sony嘅視覺印記，為用戶創造出”可被識別與感知”嘅定義。
The First Sony 作為 Sony 原創設計嘅一次嘗試，其價值亦係依到。品牌與色彩之間嘅關係，其實唔係淨係就咁配下色咁簡單，色彩既可以係帶俾品牌 Value Added 嘅一種設計元素，甚至成為品牌文化中嘅一種”視覺資產”呢。日後再同大家用更多行業實例黎分享一下囉。
補充:
設計貿易非絕對嘅惡，只係相對原創設計黎講，其價值創造會較弱。
真係要講壞嘅，我始終先諗起凱婷/左膠/學子。:p
待續......
Image source & reference:
http://www.yashicatlr.com/Nicca.html
https://www.classic-motorcycle.com/Content/Bike/bmw-r252-1952-250cc-1-cyl-ohv/a0142
http://seiyaa.web.fc2.com/dsk-seiyaasugeta.html
https://www.ununliving.com/shop/p/vintage-my-first-sony-cassette-corder-sound-pads
https://www.sony.com/en/SonyInfo/design/gallery/
